Vel heppnuð sæluvika
Tónleikarnir heppnuðust með ágætum. Fyrstur á svið var Samkór Reykjavíkur með hressandi og fjöruga dagskrá. Kórstjórinn, John Gear, var fullur orku og lífsgleði og það leyndi sér ekki í söng og framkomu kórsins. Kórinn fékk prýðisgóðar viðtökur áheyrenda, sérstaklega flutningur á þekktum íslenskum dægurlögum, svo sem "Fannfergi hugans" með Sálinni og "Fjöllin hafa vakað" eftir Bubba Morthens. Næstur í röðinni var Rökkurkórinn, á rómantísku nótunum eins og Björg Baldursdóttir kynnir þeirra komst að orði. Rómantíkin náði meira að segja þeim hæðum að lagið "Ljósbrá" var kynnt sem "Ljósblá" og vakti það kátínu í salnum. Blönduðu kórarnir sungu svo saman tvö lög fyrir hlé.
Eftir hlé var komið að karlakórunum. Rangæingar voru fyrri á svið og fljótlega kom í ljós að kynnirinn þeirra var með munninn fyrir neðan nefið. Hann sagði meðal annars frá skoðunarferð þeirra kórfélaga um Skagafjörð þá um daginn. Fararstjóri í þeirri ferð var Rögnvaldur í Flugumýrarhvammi, og ljóst að Rögni hefur haldið merkjum Kaupfélags Skagfirðinga á lofti í ferðinni. Rangæingar sögðust a.m.k. ekkert sjá nema KS merkið þegar þeir lokuðu augunum, og áttu von á að draumar þeir myndu snúast um Kaupfélagið þá nóttina. Íslensk þjóðlög vorum áberandi á þeirra dagskrá. Sérstaka aðdáun vakti einsöngvarinn þeirra, Hlynur Snær Theodórsson, en hann er hár og bjartur tenór og slíka menn kunnum við Heimisfélagar að meta.
Næstir vorum við Heimismenn og höfum vonandi komist skammlítið frá okkar hlutverki. Í lokin sungu karlakórarnir tvö lög í sameiningu og svo allir kórarnir eitt lag í restina, áður en Hvanndalsbræður komu sér fyrir á sviðinu. Þeir spiluðu svo eins og berserkir fram undir morgunn fyrir fullu húsi.
