Stjórnandi og undirleikari
Helga Rós Indriðadóttir sópransöngkona stundaði nám við Tónlistarskólann í Reykjavík og lauk þaðan tónmenntakennaraprófi árið 1992 og söngkennara- og einsöngvaraprófi árið 1996. Sama ár hóf hún nám við Tónlistarháskólann í Stuttgart. Hún stundaði nám við ljóðadeild skólans og lauk árið 1999 mastersprófi frá óperudeildinni.
Fyrsta einsöngshlutverk Helgu Rósar var Poppea í Krýningu Poppeu eftir Monteverdi sem sett var upp í Wilhelma-Theater, leikhúsi óperuskólans. Á meðan hún var enn við nám var hún fastráðin við Óperuhúsið í Stuttgart (Staatsoper Stuttgart) og debúteraði sem Freyja í Rínargulli Wagners. Helga Rós var fastráðin við óperuna í 8 ár og söng fjölda hlutverka m.a. Evridísi í Orfeo eftir Monteverdi, Venus í King Arthur eftir Purcell, Antoníu í Ævintýrum Hoffmanns, Zerlinu í Don Giovanni, Ortlinde í Valkyrjunum, Woglinde í Ragnarökum, Nackte Jungfrau í Moses og Aron eftir Schönberg en Naxos hljóðritaði þá uppfærslu, Florice í frumflutningi á Pastorale eftir Gerard Pesson. Auk þess var hún gestasöngvari í óperuhúsunum í Bonn, Wiesbaden og Karlsruhe. Í DVD útgáfu og hljóðritun Naxos af aldamótauppsetningu Niflungahrings Wagners frá óperunni í Stuttgart er Helga Rós í hlutverki Freyju í Rínargullinu og Woglinde í Ragnarökum.
Helga Rós hefur starfað með mörgum mikilsmetandi hljómsveitarstjórum s.s. Lothar Zagrosek, Janos Kulka, Raymond Leppard, Jean-Claude Malgoire, Enrique Mazzola, Kwamé Ryan, Nicola Luisotti, Roland Kluttig, Nicolas Kok, Alessandro de Marchi og leikstjórunum Peter Konwitschny, Hans Neuenfels, Christof Nel, Nicolas Brieger, Martin Kušej, Jossi Wieler og Joachim Schlömer.
Helga Rós hefur sungið Sálumessur Mozarts og Verdis, Sköpunina, Árstíðirnar og Teresíumessu Haydns, Elías og Paulus eftir Mendelssohn, Saul eftir Händel, Missa Solemnis og 9. sinfóníu Beethovens, f-moll messu Bruckners, Le Laudi eftir Hermann Suter, Orfeo eftir Pergolesi og Les Illumination eftir Britten. Árið 2005 var Helga Rós styrkþegi Wagnerfélagsins í Bayreuth.
Hún hefur einnig sungið fjölda ljóða- og kammertónleika bæði hér heima og erlendis. Árið 2009 gáfu þær Guðrún Dalía Salómonsdóttir píanóleikari út geisladisk með sönglögum Jórunnar Viðar.
Haustið 2010 tók hún við stjórn Karlakórsins Heimis í Skagafirði.
Tómas Randal Higgerson hóf ungur tónlistarnám í Bandaríkjunum, lauk license d'enseignement gráðu í píanóleik 1975 við Ecole Normale de Musique í París, bachelorgráðu í tónmennt við Southern illinois Universty at Carbondale og loks doktorsprófi 1992 við University of Illinois at Urmana-Campain. Hann hlaut fyrstu verðlaun í tónlistarkeppninni Artist Presentation í St.Lois,Missouri árið 1985. Hann starfaði sem undirleikari, kórstjóri og organisti í Bandaríkjunum 1983 – 1990. Hann hefur verið aðalundirleikari Karlakórsins Heimis frá 1991 og kennari við Tónlistarskóla Skagafjarðar frá sama tíma.
